મુંબઈ: બોલીવૂડમાં જૂના સુપરહિટ ગીતોના રીમિક્સ બનાવવાનો ટ્રેન્ડ છેલ્લા કેટલાક વર્ષોથી સતત વધી રહ્યો છે. જોકે ઘણીવાર આ રીમિક્સ જ વિવાદનું કારણ પણ બની જાય છે. હવે પ્રખ્યાત ગીત ‘ચુનરી-ચુનરી’ને લઈને મોટો વિવાદ સામે આવ્યો છે. જાણીતા ફિલ્મ નિર્માતા વાશુ ભગનાણીએ મ્યુઝિક કંપની Tips Industries સામે બોમ્બે હાઇકોર્ટમાં કેસ દાખલ કર્યો છે અને 400 કરોડ રૂપિયાના વળતરની માંગણી કરી છે.
આ વિવાદ ફિલ્મ ‘હૈ જવાની તો ઇશ્ક હોના હૈ’માં ઉપયોગમાં લેવાયેલા ‘ચુનરી-ચુનરી’ ગીતના રીમિક્સ વર્ઝનને લઈને ઉભો થયો છે. આ ગીત મૂળ રીતે ફિલ્મ ‘બીવી નં.1’નું સુપરહિટ ગીત હતું. ગીતમાં સલમાન ખાન અને સુષ્મિતા સેનની જોડી જોવા મળી હતી અને તે સમયના સૌથી લોકપ્રિય ગીતોમાં તેનું નામ સામેલ હતું.
વાશુ ભગનાણીનો આરોપ છે કે ફિલ્મમાં આ ગીતનો ઉપયોગ તેમની મંજૂરી વિના કરવામાં આવ્યો છે. તેમણે બોમ્બે હાઇકોર્ટ પાસે ફિલ્મની રિલીઝ પર તાત્કાલિક રોક લગાવવાની પણ માંગ કરી છે.
વાશુ ભગનાણીના વકીલે કોર્ટમાં દલીલ કરતાં જણાવ્યું કે તેમની કંપની Pooja Entertainment પહેલેથી જ Tipsને નોટિસ મોકલીને ઓડિયો રાઇટ્સ સંબંધિત અધિકારો રદ કરી ચૂકી હતી. તેમ છતાં જો ગીતનો ઉપયોગ કરવામાં આવ્યો હોય, તો Tipsએ પોતાના કાનૂની દસ્તાવેજો કોર્ટ સમક્ષ રજૂ કરવા જોઈએ.
આ સમગ્ર વિવાદ વચ્ચે જાણીતા દિગ્દર્શક ડેવિડ ધવન અને ફિલ્મના મેકર્સ પણ ચર્ચામાં આવ્યા છે. વાશુ ભગનાણીએ આરોપ લગાવ્યો કે ફિલ્મના ટ્રેલર લોન્ચ દરમિયાન જાહેરમાં એવું કહેવામાં આવ્યું હતું કે બંને પક્ષો વચ્ચેનો વિવાદ ઉકેલી દેવામાં આવ્યો છે, જ્યારે તેમની સાથે કોઈ સત્તાવાર ચર્ચા જ થઈ નહોતી.
તેમણે સવાલ ઉઠાવ્યો કે જ્યારે મામલો કોર્ટમાં ચાલી રહ્યો છે, ત્યારે જાહેર મંચ પરથી આવા નિવેદનો કેમ આપવામાં આવી રહ્યા છે.
ફિલ્મ ‘હૈ જવાની તો ઇશ્ક હોના હૈ’ અગાઉ પણ પોતાની રિલીઝ ડેટને લઈને ચર્ચામાં રહી ચૂકી છે. હવે આ ફિલ્મ 5 જૂને રિલીઝ થવાની છે અને બોક્સ ઓફિસ પર તેની ટક્કર ‘પેડ્ડી’ સાથે થઈ શકે છે.
હવે સમગ્ર ફિલ્મ ઈન્ડસ્ટ્રીની નજર બોમ્બે હાઇકોર્ટના નિર્ણય પર ટકેલી છે, કારણ કે આ કેસ બોલીવૂડમાં મ્યુઝિક રાઇટ્સ અને રીમિક્સ ગીતોને લઈને એક મહત્વપૂર્ણ ઉદાહરણ બની શકે છે. કાનૂની નિષ્ણાતો માને છે કે આ નિર્ણય ભવિષ્યમાં ફિલ્મો અને મ્યુઝિક કંપનીઓ વચ્ચેના કરારો પર પણ મોટી અસર પાડી શકે છે.
