ગુજરાતમાં આગામી તા.15થી સિનેમાઘરો શરૂ થઈ રહ્યાં છે , દરેક પ્રેક્ષકના મોબાઇલ નંબર લેવા ફરજિયાત: સ્ક્રીન રૂમમાં સમોસાં, કોલ્ડ્રિંકસ નહીં લવાય, ઇન્ટર્વલ લાંબો, બે શો વચ્ચે અડધા કલાકનો ગેપ
ગુજરાતમાં આગામી તા.15થી સિનેમાઘરો શરૂ થઈ રહ્યાં છે ત્યારે પહેલાં મલ્ટિપ્લેક્સ તથા સિંગલ સ્ક્રીન થિયેટરોમાં 7થી 8 શો ચલાવાતા હતા, એને બદલે કોરોના પ્રોટોકોલ ગાઈડલાઈન્સને કારણે 3થી 4 શો જ ચાલે એવી શક્યતા છે. દરેક પ્રેક્ષકે ફિલ્મ જોવા જતા પહેલાં બુકિંગ સમયે મોબાઈલ નંબર આપવો ફરજિયાત છે. સ્ક્રીન રૂમમાં સમોસાં, કોલ્ડ્રિંક્સ નહીં લઈ જઈ શકાય. એટલું જ નહીં, ફિલ્મના બે શો વચ્ચે અડધા કલાકનો ગેપ રાખવો પડશે. કેન્દ્ર સરકાર દ્વારા જે નવી ગાઈડલાઈન્સ જાહેર કરવામાં આવી છે, એમાં બે શોની વચ્ચે ભાગ્યે જ કોઈ સમય હોય છે અથવા તો પાંચ કે 10 મિનિટનો સમય હોય છે, એને બદલે હવે ઓછામાં ઓછો અડધો કલાકનો સમય જરૂરી બનશે. બે શો વચ્ચે સંપૂર્ણ સિનેમાઘરને સેનિટાઈઝ કરવાનું ફરજિયાત બનાવાયું છે. ઉપરાંત એક શો પૂરો થયા બાદ દરેક રોમાં બેસેલા લોકોને ક્રમ અનુસાર જ બહાર જવાની છૂટ આપવામાં આવશે અને એ રીતે સિનેમા શો પૂરો થયા બાદનો સમય વધી જશે. આ ઉપરાંત પહેલાં ઇન્ટર્વેલમાં પ્રેક્ષકો એકસાથે હાલ બહાર નીકળતા હતા, એને બદલે હવે વારાફરતી દરેકે બહાર નીકળવાનું રહેશે, જેને કારણે ઈન્ટર્વલનો સમય પણ વધી જશે. કેન્દ્ર સરકાર દ્વારા જાહેર કરાયેલી ગાઈડલાઈન્સ મુજબ 50 ટકા કેપેસિટીની જે નવી વ્યવસ્થા છે એમાં એક સીટ છોડીને દરેક પ્રેક્ષકે બેસવાનું રહેશે અને જે સીટ ખાલી રાખવાની હશે તેના પર ટેપ કે માર્કર લગાવવું ફરજિયાત છે. ખાલી સીટની પાછળની સીટમાં બેસાડી શકાશે. હોલની અંદર પેકિંગમાં રહેલાં ફૂડ લઈ જઈ શકાશે. સમોસાં અને કોલ્ડ્રિંક્સની જે સેવા આપવામાં આવતી હતી એ હવે આપી શકાશે નહીં. દરેક બુકિંગમાં રેલવેની જેમ પ્રેક્ષકના મોબાઈલ નંબર લેવા ફરજિયાત થઈ પડશે, જેના કારણે બુકિંગનો ટાઈમ પણ વધશે. સિંગલ સ્ક્રીન થિયેટરોમાં બુકિંગ માટે વધુ વિન્ડો ખોલવી પડે તેવી શક્યતા છે. એસીને 24થી 30 ડિગ્રી પર રાખી શકાશે. દરેક શોમાં ઈન્ટર્વલ પહેલાં અને પછી કોરોના જાગૃતિની એક મિનિટની ફિલ્મ બતાવવી પડશે. હોલની બહાર માર્કર કરીને છ ફૂટના અંતરે લોકો ઊભા રહે એ નિશ્ચિત કરવાનું રહેશે. આ ઉપરાંત પ્રેક્ષકો અંદર આવે ત્યારે તેના થર્મલ ચેકિંગ અને માસ્કની જોગવાઈનું પાલન થાય એ જોવાનું રહેશે તથા દરેક એન્ટ્રી પોઈન્ટ પર હેન્ડ સેનિટાઈઝર રાખવાના રહેશે.
નૈતિક સમાચાર (NS NEWS)
વધુ સમાચાર માટે અમારા પેજ-ચેનલ અને વેબસાઈટ ને Follow-Like અને subscribe કરો
https://www.facebook.com/NS-News-1863839916995616/
