બેંગલુરુ, કર્ણાટક
કર્ણાટકની રાજધાની બેંગલુરુમાં એક પોલીસ સબ-ઇન્સ્પેક્ટરની પોતાની પત્ની પાસેથી કથિત રીતે ₹50 લાખ દહેજની માંગ કરવા તેમજ લાંબા સમય સુધી શારીરિક અને માનસિક ત્રાસ આપવાના આરોપમાં ધરપકડ કરવામાં આવી છે. આરોપીની ઓળખ ભૈરપ્પા કે.એસ. તરીકે થઈ છે, જે બેંગલુરુ પોલીસ કમિશનર કચેરીમાં ફરજ બજાવતો હતો. પીડિતા, જે વ્યવસાયે વકીલ છે, તેમણે રાજ્યના પોલીસ મહાનિર્દેશક (DGP)ને સીધી ફરિયાદ કર્યા બાદ આ કાર્યવાહી શક્ય બની હતી.
પીડિતાના જણાવ્યા અનુસાર, લગ્નના શરૂઆતના થોડા વર્ષો બાદથી જ આરોપીએ વધારાના દહેજની માંગણી શરૂ કરી હતી. તેણે આરોપ લગાવ્યો કે તેનો પતિ ₹50 લાખ રોકડ, એક મકાન અને જમીન ખરીદી આપવાનો સતત દબાણ કરતો હતો. માંગણી પૂર્ણ ન થતાં તે સતત મારપીટ કરતો, માનસિક રીતે હેરાન કરતો અને છૂટાછેડાની ધમકી આપતો હતો.
મહિલાએ જણાવ્યું કે તેણે અગાઉ પણ સ્થાનિક પોલીસ સ્ટેશનમાં ફરિયાદ નોંધાવવાનો પ્રયાસ કર્યો હતો, પરંતુ ત્યાં હાજર ઘણા પોલીસ અધિકારીઓ આરોપીના બેચમેટ હોવાના કારણે માત્ર નોન-કૉગ્નિઝેબલ રિપોર્ટ (NCR) નોંધાવી મામલો ટાળી દેવાયો હતો. ત્યારબાદ તેણે DGPને મળી સમગ્ર ઘટનાક્રમની માહિતી આપી, જેના આધારે તપાસ શરૂ કરવામાં આવી અને આરોપીની ધરપકડ કરવામાં આવી.
ફરિયાદમાં મહિલાએ દાવો કર્યો છે કે તેના પિતાએ લગ્ન બાદ આરોપીની માંગ મુજબ બે કાર ખરીદી આપી હતી અને અનેક વખત આર્થિક મદદ પણ કરી હતી. તેમ છતાં આરોપીની માંગણીઓ સતત વધતી ગઈ. મહિલાનો આરોપ છે કે તેનો પતિ તેના ચારિત્ર્ય પર શંકા કરતો હતો, જ્યારે પોતે અન્ય મહિલાઓને ઘરે લાવતો હતો. તેણે વધુમાં જણાવ્યું કે અનેક વખત તેની સાથે નિર્દયતાપૂર્વક મારપીટ કરવામાં આવી હતી અને તેને તેની પુત્રી સાથે ઘર બહાર કાઢી મૂકવામાં આવી હતી.
મહિલાએ 12 જુલાઈની એક ઘટનાનો પણ ઉલ્લેખ કર્યો છે. તેના જણાવ્યા અનુસાર, તે દિવસે તેના પિતા ઘરેલુ વિવાદ ઉકેલવા માટે આરોપીના ઘરે ગયા હતા, જ્યાં ભૈરપ્પા કે.એસ.એ કથિત રીતે ધારદાર હથિયારથી તેમના પર હુમલો કર્યો હતો. ફરિયાદમાં એવો પણ આરોપ મૂકવામાં આવ્યો છે કે આરોપીએ ગુનેગારો મારફતે સમગ્ર પરિવારને જાનથી મારી નાખવાની ધમકી આપી હતી.
પીડિતાએ વધુમાં જણાવ્યું કે ભૈરપ્પા કે.એસ. અગાઉ લાંચ લેવાના એક કેસમાં સસ્પેન્ડ પણ થઈ ચૂક્યો છે. જોકે, હાલના મામલે પોલીસે જણાવ્યું છે કે તમામ આરોપોની નિષ્પક્ષ તપાસ કરવામાં આવી રહી છે અને ઉપલબ્ધ પુરાવાઓના આધારે આગળની કાયદાકીય કાર્યવાહી કરવામાં આવશે.
હાલમાં આરોપી પોલીસ કસ્ટડીમાં છે અને કેસની તપાસ ચાલુ છે. પોલીસ અધિકારીઓના જણાવ્યા મુજબ પીડિતાનું નિવેદન, દસ્તાવેજી પુરાવા, મેડિકલ રિપોર્ટ અને અન્ય ઉપલબ્ધ પુરાવાઓના આધારે તપાસ આગળ વધી રહી છે. જો આરોપો સાબિત થશે તો આરોપી સામે કાયદા મુજબ કડક કાર્યવાહી કરવામાં આવશે.
