કાળો સમુદ્રમાં ભારતીય નાવિકોની સુરક્ષા મુદ્દે ભારતની ચિંતા, વિદેશમંત્રી એસ. જયશંકરે રશિયન વિદેશમંત્રી લાવરોવ સાથે કરી મહત્વપૂર્ણ ચર્ચા

મનીલા, ફિલિપાઈન્સ

મનીલા, ફિલિપાઈન્સ: રશિયા-યુક્રેન યુદ્ધ વચ્ચે કાળા સમુદ્ર વિસ્તારમાં કાર્યરત ભારતીય નાવિકોની સુરક્ષાને લઈને ભારતે ફરી એકવાર ગંભીર ચિંતા વ્યક્ત કરી છે. ભારતના વિદેશમંત્રી ડૉ. એસ. જયશંકરે બુધવારે રશિયાના વિદેશમંત્રી સર્ગેઈ લાવરોવ સાથે યોજાયેલી બેઠક દરમિયાન આ મુદ્દાને પ્રાથમિકતા આપી હતી. આ બેઠક એવા સમયે યોજાઈ હતી જ્યારે યુક્રેનના દરિયાકાંઠા નજીક એક વ્યાપારી જહાજ પર થયેલા રશિયન હવાઈ હુમલામાં ચાર ભારતીય નાવિકોના મોત થયાની ઘટના સામે આવી છે.

ડૉ. એસ. જયશંકર અને સર્ગેઈ લાવરોવ વચ્ચેની આ મુલાકાત ફિલિપાઈન્સની રાજધાની મનીલામાં યોજાયેલા આસિયાન (ASEAN) સંબંધિત કાર્યક્રમ દરમિયાન થઈ હતી. બંને નેતાઓએ ભારત-રશિયા દ્વિપક્ષીય સંબંધો, વેપાર, રોકાણ, ઊર્જા સુરક્ષા તેમજ પ્રાદેશિક સુરક્ષા સહિતના વિવિધ મુદ્દાઓ પર વિસ્તૃત ચર્ચા કરી હતી. આ દરમિયાન ડૉ. જયશંકરે ખાસ કરીને કાળા સમુદ્ર વિસ્તારમાં ફરજ બજાવી રહેલા ભારતીય નાવિકોની સુરક્ષા અંગે ભારતની ચિંતાઓ રશિયન પક્ષ સમક્ષ રજૂ કરી હતી. બંને નેતાઓએ રશિયા-યુક્રેન સંઘર્ષની વર્તમાન પરિસ્થિતિ અંગે પણ વિચારોનું આદાન-પ્રદાન કર્યું હતું.

તાજેતરની ઘટનામાં યુક્રેનના દરિયાકાંઠા નજીક ગિની-બિસાઉના ધ્વજ હેઠળ સંચાલિત એક વ્યાપારી જહાજ પર રશિયન હવાઈ હુમલો થયો હતો. આ હુમલામાં જહાજ પર ફરજ બજાવી રહેલા ચાર ભારતીય નાવિકોના મોત થયા હતા. આ દુઃખદ ઘટનાને લઈને ભારત સરકારે ઊંડો શોક વ્યક્ત કર્યો હતો અને જણાવ્યું હતું કે વિદેશમાં રહેલા ભારતીય નાગરિકોની સુરક્ષા સરકાર માટે સર્વોચ્ચ પ્રાથમિકતા છે.

આ ઘટનાથી પહેલાં નવી દિલ્હીમાં ભારતના વિદેશ મંત્રાલયે રશિયન દૂતાવાસના કાર્યકારી અધિકારી વ્લાદિમિર લાદાનોવને તાત્કાલિક બોલાવ્યા હતા. બેઠક દરમિયાન ભારતે આ ઘટનાને લઈને ગંભીર ચિંતા વ્યક્ત કરી હતી અને યુદ્ધગ્રસ્ત વિસ્તારોમાં કાર્યરત ભારતીય નાગરિકોની સુરક્ષા સુનિશ્ચિત કરવાની આવશ્યકતા પર ભાર મૂક્યો હતો. સાથે જ ભારતે આ ઘટના અંગે પોતાનો સત્તાવાર વિરોધ પણ નોંધાવ્યો હતો.

ભારત સતત એ વાત પર ભાર મૂકી રહ્યું છે કે રશિયા અને યુક્રેન વચ્ચે ચાલી રહેલા સંઘર્ષનો ઉકેલ સૈન્ય કાર્યવાહી નહીં પરંતુ રાજદ્વારી વાતચીત અને શાંતિપૂર્ણ સંવાદ દ્વારા શોધવો જોઈએ. ભારતે અત્યાર સુધી બંને દેશો સાથે સંતુલિત સંબંધો જાળવી રાખ્યા છે અને વિવિધ આંતરરાષ્ટ્રીય મંચો પર સંવાદ અને કૂટનીતિક ઉકેલનું સમર્થન કર્યું છે.

વિદેશ મંત્રાલયના જણાવ્યા અનુસાર સરકાર યુદ્ધથી પ્રભાવિત વિસ્તારોમાં રહેલા ભારતીય નાગરિકોની સુરક્ષા પર સતત નજર રાખી રહી છે. જરૂર પડ્યે સંબંધિત દેશો સાથે સંપર્ક સાધીને જરૂરી પગલાં લેવામાં આવે છે. વિદેશમાં આવેલા ભારતીય દૂતાવાસો પણ સ્થાનિક વહીવટી તંત્ર અને સંબંધિત એજન્સીઓ સાથે સતત સંકલન જાળવી રહ્યા છે, જેથી ભારતીય નાગરિકોને સમયસર જરૂરી સહાય પૂરી પાડી શકાય.

વિદેશ નીતિના નિષ્ણાતોનું માનવું છે કે ચાર ભારતીય નાવિકોના મોત બાદ આ મુદ્દો ભારત માટે વધુ સંવેદનશીલ અને મહત્વપૂર્ણ બની ગયો છે. રશિયા સાથે ઉચ્ચસ્તરીય બેઠકમાં આ મુદ્દાને પ્રાથમિકતા આપવી ભારતની સક્રિય કૂટનીતિક પહેલનો ભાગ માનવામાં આવે છે. હાલ ભારતની સૌથી મોટી પ્રાથમિકતા યુદ્ધગ્રસ્ત વિસ્તારોમાં રહેલા ભારતીય નાગરિકો અને નાવિકોની સુરક્ષા સુનિશ્ચિત કરવાની છે. આગામી દિવસોમાં આ મુદ્દે ભારત અને રશિયા વચ્ચે વધુ રાજદ્વારી ચર્ચાઓ અને સંકલન આગળ વધવાની શક્યતા વ્યક્ત કરવામાં આવી રહી છે.